Asɔrefoɔ no nkyerɛkyerɛmu
1 Ɛnna ɔde me kɔɔ asɔredan no mu, na ɔsusuu adum no basafa nsia trɛ wɔ ha ne basafa nsia trɛ wɔ ha, ɛne ntomadan no trɛ.
2 Na ano kwan trɛ yɛ basafa du, na ano kwan no nkyɛnnkyɛn yɛ basafa nnum wɔ ha na basafa nnum wɔ ha; na ɔsusuu ne ntwemu, basafa aduanan ne ne trɛ, basafa aduonu.
3 Ɛnna ɔkɔɔ dan no mu kɔsusuu ɛpono ano adum no, basafa mmienu, ne ɛpono no, basafa nsia, na ɛpono no trɛ yɛ basafa nson;
4 na ɔsusuu ne ntwemu basafa aduonu ne ne trɛ basafa aduonu, asɔredan no anim; na ɔka kyerɛɛ me sɛ: Ɛha ne kronkron mu kronkronbea.
5 Ɛnna ɔsusuu ɛdan no fasuo, basafa nsia, ne ɛho mpia no trɛ, basafa nnan de twaa ɛdan no nyinaa ho hyiaeɛ.
6 Na nkyɛn mu mpia no, pia si pia so ahodoɔ mmiɛnsa, saa ahodoɔ aduasa, na ɛkɔ ɔfasuo a ɛwɔ ɛdan no ho ma mpia no so, twa ho hyia, ɛma no sosɔ mu, nanso ɛnsosɔ ɛdan no fasuo mu;
7 na mpia no rekɔ soro hyia no, na emu retrɛ, na ɛdan no ho mpia no kɔ soro ara twa ɛdan no ho hyia, enti emu trɛe wɔ ɛdan no ho wɔ soro, na ɛde saa firi aseɛ deɛ no mu fa mfimfini deɛ no mu kɔ soro deɛ no mu.
8 Na mehunuu ɛdan no ho bamma a ɛtwa ho hyia a ɛne nkyɛn mu mpia no nnyinasoɔ, ne hini korɔn duru basafa nsia ɛne demmire no pɛ.
9 Nkyɛnmu mpia no akyiri fasuo no trɛ yɛ basafa nnum, na deɛ wɔgyaa no ɛdan no ho nkyɛn mu mpia no ho no nso saa ara.
10 Na adammoa no ntam trɛ yɛ basafa aduonu de twa ɛdan no ho hyia twan.
11 Na nkyɛn mu mpia no apono ano kwan kɔ deɛ wɔgyaeɛ no so, ɛpono ano baako hwɛ atifi fam, na ɛpono ano baako hwɛ anafoɔ fam, na ɛkwan a wɔgyaeɛ no trɛ yɛ basafa nnum twa ho hyia.
12 Na ɛdan a ɛsi efie no akyiri adihɔ, atɔeɛ fam no trɛ yɛ basafa aduɔson, na ɛdan no fasuo trɛ yɛ basafa nnum de twa ho hyia, na ne ntwemu yɛ basafa aduɔkron.
13 Na ɔsusuu ɛdan no ntwemu, ɛyɛ basafa ɔha, ne afikyire adihɔ ne ɛhɔ dan no ne n’afasuo ntwemu, basafa ɔha;
14 na ɛdan no anim trɛ ne n’adihɔ no deɛ, apueeɛ fam, yɛ basafa ɔha.
15 Saa na ɔsusuu ɛdan a ɛsi n’adihɔ no anim a ɛkɔduruu n’akyi ne ɛho mmrannaa a ɛwɔ ho ntwemu, basafa ɔha, ne asɔredan no mu abannwa no ntwonoo.
16 Apono ase ne mpomma aniahunuankansa ne mmrannaa a ɛtwa ne mmiɛnsa no ho hyia no, aponnwa a wɔde dua adura ho ahyia no, ne fam de kɔka mpomma no ho no, ne (mpomma a wɔakatakata ho no),
17 apono ano atifi hɔnom, ɛdan no mu fam ne akyire fam ne afasuo no nyinaa twan, emu fam ne ɛho fam, ne nyinaa wɔ ne nsusuiɛ.
18 Na wɔayeyɛ kerubim ne mmɛ, na abɛ wɔ kerub ntam, na kerub wɔ anim mmienu;
19 na onipa anim hwɛ abɛ wɔ fa ha, na gyata anim hwɛ abɛ wɔ fa ha; wɔyɛɛ no ɛdan no mu nyinaa hyiae.
20 Ɛfiri fam kɔsi pono no atifi na wɔayeyɛ kerubim ne mmɛ no asɔredan no fasuo ho.
21 Asɔredan no wɔ aponnwa ahinanan, na kronkronbea no anim deɛ te saa ara.
22 Afɔrebukyia no yɛ dua, ne korɔn yɛ basafa mmiɛnsa, na ne ntwemu yɛ basafa mmienu, na ne ntweaso ne ne nnyinasoɔ ne n’afasuo yɛ dua. Na ɔka kyerɛ me sɛ: Yei ne ɛpono a ɛsi AWURADE anim.
23 Na asɔredan no asa ne pia kronkron no wɔ apono mmienu.
24 Na apono no yɛ ntanta, apono mmukamu mmienu mmienu. Mmienu yɛ ɛpono baako deɛ, na ɛpono mmienu yɛ baako deɛ.
25 Na wɔayɛ asɔredan ano apono no so kerubim ne mmɛ, sɛdeɛ wɔyɛɛ no afasuo no ho no. Na dua ntiasoɔ wɔ ntwonoo no anim adihɔ fam.
26 Na mpomma aniahunuankansa ne mmɛ wɔ ɔfa ha ne fa ha, ntwonoo no nkyɛn mu ne ɛdan no nkyɛn mu mpia ne nkatasoɔ mpuna no ho.